السبت، 12 نوفمبر 2011

احمد عبدالموجود الشيخ يكتب : انا غيرهم


نزلت للدنيا شايل قدرى ومطمن
كنت مدى امان لكل الناس وما مخون
وواحده واحده لقيتنى وحدى دموع العين بتتهون
ومره واحده قابلت واحده ف ثانيه واحده
حلم العيون لابيض ولاسود اصبح بيتلون
شافت صفار الخير ف سنابل قمح اخضر بيتبين
شافة زرقة سما وسحاب ابيض بيتكون
ياما ناس قبللى شافوا احلامهم ولمسوها
وصلولها وهى ف ايدهم بينسوها
وكتبوها قصايد ورق ويرموها
بقت ذكرى ف حدوته يحكوها ويروها
لا واللى ابشع تقدم عهودهم فيخونوها
انا غيرهم ........... انا غيرهم
طرق الوصول ف زمانى اشبه بفزوره
طرق الوصول ف زمانى لازملها مبلغ ودبوره
اما اللى يكوس واموره يسييس يبقه اسطوره
ابص فمرايتى ما اعرف انا اللى اتنين ولا المرايه مكسوره
انا غيرهم مقدرش اركب وش فوق الوش
مقدرش اعيش بالغش مقدرش اعبى الكرش
رشاوى وبلاوى وحقوقى مهدوره
يا مقسم الارزاق وتدابيرك ليك ف الشئون معنى
هسيبهالك وانا راضى هيجى اليوم وتجمعنا

الأربعاء، 9 نوفمبر 2011

أحمد عبد الموجود الشيخ يكتب: علبة ألوان( على اليوم السابع)

http://www.youm7.com/News.asp?NewsID=480537

ف ليل لا أنا عارف ضلام ولا نور
حزين والضحكة لىّ رافضة تزور
حاولت أعبر بأحساسى ف كراسى
لكنى مش لاقيله سطور
شايف ناس وشوش بتدور
الصبح نور فتح عنين عصفور
راجل غلبان فتح الدكان
مستنى رزق ربنا الحنان
ف أيديه رعشة كبر سن
بس قلبه مليان إيمان
ست بتبيع الخضار وتئن
ونفسها تجيب لابنها ألوان
أصحابه ف المدرسة يبكوه
يرجع يشكى لأمه وأبوه
أبوه دور ف دكانه على علبة لألوانه
وأمه تسح دموع علشانه
قالها يامه عاوز حتة لون واحد
أرسم بيه شجرة بتسبح الواحد
حلمه كله كان لون ف كراس
ولا داخله رحمة بين ضلوع الناس
رسم الولد رسمه بلون فردى
رسم وردة مدهونة لون وردى
عملوا مسابقة رسم تعذيبى حزنان
الولد طلع أول فاز بعلبة ألوان
___________________

احمد الشيخ يكتب : حلم الحريه

_*_*_*_*_*_*_*_*_*_*_*_*_*_*_*_*_*_*_*
اذ انت ثرت فنمت فأنت والمغشى سواء
وان ائتمنت من لم يستحى فسيفعل ما يشاء
فلا جدوى من خائن لن يمنعه عن الغدر وفاء
ماذا تبق لنا من حلم الحرية سوى قائمة بأسماء
فيها قتيل وفيها كفيف وفيها مفرق الاشلاء
منها من ماتوا بوجهة قاتليهم وبوجهتنا هم الاحياء
على حلم الحرية ابكى فما استطعت له ارساء
ولكنى ضقت ذرعا فلن يعيد لى حلمى البكاء
نزلت بنا شدائد الدهر ونقول من بعدها رخاء
من ارتد عن ميدان الحرب فبما نميزه عن النساء
تذكر يوم ظنك نلت حريتك ولا تكن مثلهم نسساء
تكالبت وجوه اصحاب المصالح سعيا خلف منصبا
او لقبا او حتى كرسى قد يرضى بداخلهم الاهواء
ولئن سألتهم لما ؟ لن يقولوا هكذا شئنا او اردنا
ولكن يبقى قولهم لمن حولهم هكذا الله شاء
تحالفتم انتم وهم فقتلتم بتحالفكم حلم جيل
فأبناء هذا الجيل يخبروكم انهم منكم ومنهم براء
_________________________________________
حقوق النشر محفوظه للمؤلف ويعتبر النشر بهذا التاريخ توثيق لحق الملكيه الفكريه

احمد عبدالموجود الشيخ يكتب : القطر والتحرير

فرق كبير ما بين القطر والتحرير
مع ان ناسهم مصريين مفيش تغيير
الصوت ف القطر عالى شتم وسب
هناك كان برضه عالى ضد سلب ونهب
وتسمع واحد يقول عدى اختك فى الميدان
من الكنيسه كان يطلع صوت الآذان
هنا صوت بياع سريح عدينى يا بيه
وكأن القطر ده هوه وارث ليه
ف القطر بندوس بعض من الزحمه
هناك ماسكين ايدين بعض من الرحمه
ولد يصرخ ام الطفل اللى جنبه تسكته
لآن امه ,شايله ابن الست دى
واحد ف القطر خدله  كرسى متبت فيه
هناك راحوله وشالوه  من عليه
سامع جنبى واحد يشكى من مراته
واللى زعلان القطر فاتوا
واللى عيان جاى من طبيب
ودى تشكى همها قلة حبيب
القطر مليان شحاتين
فى القطر كلنا مساكين
هناك الولاد ف ايديهم ماسكين
لوحات ضد المسؤلين الفاسدين
لوحات ضد نظام المتسولين
اللى عرانا عريانين
واللى خلانا مكفوفين
حسيت قطرنا كله ستات
لما سمعت بأول واحد مات
قلبى صرخ مع ام الشهيد
مع كل نقطه من دم الشهيد
فى القطر كلنا كنا عبيد
شحات ابن عز عملوه لينا سيد
وسرور اشترى برلمان القطر
وخرج منه فى ايديه الحديد
كنت اشوف فى القطر اشباح
مسا وصباح زعاق وصياح
هناك العالم واقف جنبه فلاح
اذان ينادى حى على الفلاح
مسيحى يقول ترنيمه عن السماح
القطر ضلمه واحساس خوف
نشل وسرقه ونصب بنشوف
فى القطر كنا كلنا ف  حصار
وزى ما بنكسر قزاز القطر
كسروا فينا الافكار
اصل فكرنا ده شباكنا على العالم
وعمرنا اللى عشناه مع الظالم
كان برضه فيه افكار
مولعه فى الكتب نار
ومع الشعراء اشعار
بس ما بتطلعشى لاننا فى قطر دمار
الناس فاض بيها وقامت ثوره وثوار
وأولها جيش نزل مع شعب وانتهى الموضوع
شبح الخوف هرب ومعادش له تانى رجوع
قلنا افرحى يا شوارع مصر وياربوع
مش هنشوف فى شوارعك تانى جربوع
قلنا التحرير هيكون للخير ينبوع
عدى شهر ويومين وكام اسبوع
الناس قرصها من تانى الجوع
قالوا يلابينا تحرير, قالوا ممنوع
التحرير اتقفل والامر كان مسموع
_وسمعت صوته بينادى متقفلونيش
ماتسيبوا الدم يا ولادى وماتسبونيس
روح شهيد وقفت ف وش العساكر
قلنا يا عسكرى ادى دليل ثوره
قال دى ثورة ايه ومين فاكر؟
اتلموا الشهداف السمانازلين الارض من تانى
شافوا مفيش غيرهم يموت من اجل اوطانى
ولادنا ماتوا فاكرينها ثوره بجد
واحنا حطينا وغطينا كل خد بيد
من ايد لايد تكبر يا وطن وتزيد
مات الشهيد, والثوره مبروره
بكلام وهتاف طيارنا غاب عن الصوره
وطلعلنا بيضحك  والسنه مكسوره
نايم ولا هامه ماهى عداله مجروره
بعدما الضى ملا عينا وشفنا النور
اهم طلعوا ملاعينا بيحلفوا زور
ده طلع درويش و شيخ منصر
يمين ربنا يتحلف ويتخلف ويتكسر
كتروا دراويشك يا وطن سبح وبخور
وبرضه التحرير اتقفل بألفين سور
افتح ميدانك يا وطن,وياشعب ثور
النصر يجى بكفن,كفيانا شغل بخور

احمد عبدالموجود الشيخ يكتب : ف العيد

____^___^_____^___^_____
فى العيد شفت عيال فراشات
البنات ماسكه عرايس وبالونات
الولاد بدلة ظابط جيش ومسدسات
متستغربوش اه بدلة ظابط جيش
اصل الناس عاوزه تاكل عيش
يا اما نعيد كده يا اما العيد مفيش
يلغوه زى اجازة خمسه وعشرين
شفت طفل صغير مكسور وحزين
قربت منه لقيت دموعه على الخدين
سألته مالك قال انا من الناس زعلان
عندهم عيد واخويا روحه فى الميدان
لا احنا كملنا المسيره ولو جبنا تانى السيره
هنصبح خونه وف خبر كان
يرحم ايام زمان  انا حاسه مش فرحان
كان يلعب معايا يوم العيد ونعيد ع الجيران
دلوقتى مين حاسس بيا ولا محسسنى بأمان
انا مش عاوز عيد انا عاوز حق اخويا الشهيد

احمد الشيخ يكتب : ياريتنى اخدت الوصل

=================================
اصدقاااااااااائى :
انا كنت فرحان جدا وقلت خلاص هندوق طعم الحريه الثوريه وحقوق الثوره هتيجى وشفت المرشحين واقفين على قلب رجل واحد قلت بس الناس دى والله خايفه على مصلحة البلد اول حاجه لانهم طلعوا موش مواطيين (للى خانوا الامانه)ايوه خانوا الامانه مش فيه شباب عمل مظاهرات نزل وراه اهلهم والشعب كله فأصبحت ثورة شعب على ن...ظام ,,, والمفروض ان اللى قام بالثوره يحكم لكن المخلوع قالك (ميحكمشـــــــــــــــــى) لانه مفيش قائد, قلنا الدستور بيقول غير كده بيقول رئيس مجلس شعب مكانك لحد ما نوظف غيرك وان كان مفيش مجلس وده اللى حاصل فهيكون رئيس المحكمه الدستوريه العليا قالك ,الدستور برضه ( ميحكمشـــــــــــــــى) لانه انتوا اسقطتوا النظام فالدستور سقط . قلنا ماعلينا الجيش والشعب ايد واحده (وطلعت فعلا ايد واحده اللى ممدوه والتانيه بتسلك اللى قتلوا وتطلعهم براءه وتضحك على الاحزاب بشوية كراسى موش هيشموا ريحتهم لان الدستور اللى هيجى ممكن تكون فيه نصوص معينه كشروط فى مرشحين او ما الى ذلك موش فى المرشحين اللى عشموهم دول . او الدستور يتحبك ويدى الرئيس الجديد حق حلله بطريقه حلوه كده مزخرفه محدش يلاحظها زى الدستور اللى لا انا عارفه سقط على كلام مبارك ولا مسقطش على كلامهم فيجى يروح يحلله برضه فهيتحل المجلس تانى فيطردوا شر طررده __غير ان التاريخ بيشهد على كده زى ما كلنا شفنا اكيد مقالة السادات اللى منشوره على الصفحات حاليا_ المهم انا عرفت اخيرا ايه اللى عمل فينا كده(ثوره ومخدنهاش وأستأمنا عليها ناس مش ناخد منهم وصل امانه.. غلطتنا نسينا ناخد منهم وصل ده كمان, لبسوا اللى قالوا نعم انهم قالو نعم ليهم وادى انهارده لبسوا الاحزاب انهم يقولوا نعم ليهم وقالوها (خلاص انا قررت طالما موش معايا وصل والقانون لا يحمى المغفلين اذا اروح العب المزرعه)
____________________________________________________________________

فى ذكرى رحيل جيفارا

زي النهارده تركنا المُناضل الأرجنتيني المنشأ إرنستو تشي جيفارا .. برصاص القوات البوليفيّة المواليّة للولايات المُتحدة الإرهابيّة الأمريكيّة ..
حلم كثيرا بأن لا يشاهد الفقراء يخدمون الرأسماليين وهم حفاة الاقدام _____ قاد ثورته التى كان شعارها (الوطن او الموت) ومن كلماته الشهيره :: (حيثما وجد الظلم فذاك هو وطنى ___(الثوره قويه كالفولاذ حمراء كالجمر باقسه كالسنديان عميقه كحبنا الوحشى للوطن ) جيفارا كان مع القضيه الفلسطينيه على الرغم من انه مش مسلم لكن بس عشان انه شايف ان الحريه حق مشروع ومش بيجى  غير بنضال .... ده غير ان عبد الناصربعد ثورة طلب لقاءه فى سنة 56 فقال جملته الشهيره له ((انا جاهز لما تطلبنى اليه فأنتم لكم كامل الحق فى دفع الظلم الاسرائيلى عن الامه العربيه ))هذا هو التاريخ
اما  عن الحاضر(فلقد تأججت بصدور الشباب المرتطم بالواقع والذى شاهد الظلم كما الدوود والوطن كالجثه المتعفنه وذاك الدوود يخترقها من كل مكان فبداوا اولا بالقراءه عن الثورات وتعللموا كيف يكو ن النضال بدا تظاهرات تظاهرات بأشكال مختلفه من الطبيعى ان قوبلت بالقمع الوحشى  الى ان اراد رب العزة ان تتفح وروود فى ميدان  التحرير وبدأت الثوره ولكنها (مازالت مستمره) ارجو من الجميع ان يتوقف للحظات عن التخبطات الحاليه ويبحث فى تاريخ الثورات ويرى السيناريوهات المختلفه حتى نرسخ ثقافه وتتشبع صدورنا بالمعلومه فنستطيع بعدها الحكم ونقرر هل نحن مع ,,,المنادوون بأن الثوره مستمره وان ما يحدث ما هو الا تهدئة ضوء الثوره حتى تنطفئ تمام وتعود الامور كما كانت . وهذا متفق عليه من اشباح نظام الجوع والفقر والسرطانات  منذ ان ارتفعت حالة الغضب فتلك طريقه مطاطيه لامتصاص ذلك الغضب اخذت منهم الوقت الكثيير بعد ان حاولوا اخماد ذلك الغضب بقرارات وتصريحات لم تقابل الا( عفوا) برفع الاحذيه ____
 ام ستكون مع المنادون بالاستقرار الوهمى الذى لو احدنا تذكر كان يخدعنا به مبارك ووسيلته الوحيده لكتم الصوت هى ان نعمل حتى يصبح شغلنا الشاغل لقمة العيش واقتصادنا المنزلى البسيط_ويلهث هو واعوانه فى ماراثون جنى البلايين خلاصة تلك الرساله لا تستهن  بدورك فالنضال الكبير تقتل وتقطع الاشلاء فيه والنضال الاصغر من الكبير تعرض نفسك فيه لذلك القتل والنضال الاصغر من ذلك  هو قد يكون كلمه  غيرت وجهة نظر شخص فى ثورتك  وانتشرت بعدها بين عدة اشخاص وهكذا حتى تكتمل الثوره  (افيقوا يرحمكم الله _____________هل من مناضل؟؟؟

احمد عبدالموجود الشيخ يكتب : مركب فلسطين

فلسطين يا مركبه موقفها الهم
مبتمشيش غير فى بـــحر الــدم
حــاوطوكى بـــجـدار فــاشل
وســـمــوه جـــدار عــــازل
داخـــلين بدبـــابـــات ولـغم
وقـصــادهم طــوب وعـــلم
رسمـــولك خــارطة الـطريق
وف بــحر دمـــك  كام غريق
شهداء ماشى بس ليهم ام
هى اللى ربت ونفسها تضم
وبدل ماتجنى ولادها ورود
بتلم جسسهم محشيه بارود
بالذمـــه ده كرامة العرب
سيبناهم يموتوا من غير كرب
ويقـــولك وطـــن عربــــــــــى
الوطـــــن العــــــــربى اتخــرب
لبنان بتعانى والقدس وحدانى
كويــت وعـــراق ,واحـد ظلم
ربـــنا بـــعـــت مــحتــل للتانى
لـحد امـــته يـــــا احـــــــــنا
مـــــش مكـــتوب لنــا نحارب
ونـــــمـــــــوت الــــمحـــنه
يـــــمشــــــى الــعدو هارب
واحد له تار مضروب بالنار
تـــــقولـــه هــــــــات حـقك
يــــقـــولك لا الــحرب دمار
وهــــو اللـــى احـــنا فــــيه
مـــــــش بـــــرضــــــه دمـار
يــــا وطــــنى شمال وشرق
غـــــــــــــرب وجـــــــــنوب
اصـــــــحـــــــى قبل ما تلاقى
 شمــــــــــسك غـــــــــروب
فـــــــيه حـــــــق مــغصوب
هيجى بشعر وكلام مكتوب
انا شايف النصر اهو باين
بس عمره مايجى مدام هاين

احمد عبد الموجود الشيخ يكتب :خشب ف خشب

الدنيا زى مدرجات الكليه خشب ف خشب
تتولد ف سنه اولى والمزاج عالى وعجب
وشهاده تنقلك لنص حياتك التانى
ولو موصلتش ينتابك الغضب
احساس الظلم مع اول قلم مليان الم
ف دنيا العبث والهم يتسجل شغب
ضحكة الدنيا ضحكه صفرا
كشفت سنانها وفجاه الضحك اتقلب
ل ورنيش ف صندوق ومناديل ورق
ع الارصفه وعيشة دبب
ريحة بخور مجاذيب دايبه ف ريحة الشيشه
ومد الايد والسقى ضهره شايل قرب
الصرخه من الجوع تعلا وتطلع
والصوت يلتهب زى نار الحطب
ونوم الرصيف وبرد الصيف
من قلة الكسوه خللا الضلاع خشب

احمد عبدالموجود الشيخ يكتب : قهوه بلدى


قعده حلوه ف قهوه بلدى
صباح الخير يا حج صباح النور يا ولدى
ابتسامة الشمس دافيه الصبح بدرى
طابور العيش وعلى اكل العيش الناس بتجرى
فيه ناس ف عربيات لابسه ع الموضه
وع الاسفلت خطوة ام رايحه بأبنها الروضه
الصبح مليان شنط وفيها كتيير
دى فيها كتب ودى مانيكير
وست حامل على الرصيف بتتمشى
جنب غلبان نور الشمس طلع بان
وهولسه ما اتعشى
ف القهوه حد بشوش واللى جاى نكدى
فيها كرم وضيافه وده لده يهدى
زمان كان فيها لحن العود نغم بيتغنى
يهز المناضل ينفجر لغم ما يستنى
ودرويش والحانه يابلح زغلول معنى
قعده حلوه ف قهوه بلدى
الناس ف القهوه اوراق
بورقه اتولدوا وبورقه عاشوا
وبورقه روح رجعت لربها الخلاق
وفيه تلميذ رايح مدرسته بخناق
اتخرجوا التلاميذ خدوا اوراق
ده اشتغل عامل وده اتجند وده سواق
وبرضه الصبح بدرى قعدوا
قعده حلوه ف قهوه بلدى

ده كان رأيى ف التعديلات الدستوريه


بسم الله الرحمن الرحيم
بخصوص التعديلات الدستوريه
اسباب القائلين بنعم
1- ان التعديلات تضمنت ايجابيه فى عدم مساسها للماده الثانيه من الدستور0
2- كما انها كانت ايجابيه فى الغاء الماده (179)والخاصه بمكافحة الارهاب والتى كانوا يعتبرونها سيفا موجها على العمل الاسلامى برمته0
3- ايضا يروق لهم ايجابية تحديد مدة الرئاسة بأربع سنوات فقط وعدم جواز مدها الا لمده واحده مما يغلق الباب امام من يريد الطغيان والفساد0
4- ان التعديلات تضمنت ايجابيه فى مسألة الاشراف القضائى على الانتخابات لضمان لنزاهتها واختصاص المحكمه الدستوريه العليا بالفصل فى الطعون المقدمه فى صحة عضوية اعضاء مجلس الشعب
هذا كان قولهم0
اما انا فسأقول (لا) وتلك هى اسبابى
1-اولا بالنسبه لمجمل النقاط والأيجابيات الملموسه فى النصوص المقترحه لا اختلاف على ايجابيتها وانها ستعود بالنفع العام على الجميع ولكن هناك اكثر من مائة ماده لم م يتعرض لها ولم يلقى عليها الضوء0
نحن نعلم ان الدستورالساقط (211) ماده تم التعديل فى سبع واضافة فقرتان اى تسع اى ان هناك حوالى مائتان ماده لم يتم التعرض لها سنقول ان هناك حوالى مائه مرتبطه بمقومات اساسيه واخلاقيات اساسيه فى المجتمع و مواد لا يمكن تعديلها لانها ثابته فى جميع دساتير الدنيا ومتفق عليها ولكن ؟000000000
*/*/*/بالمثال يتضح الحال:
تلك النقاط وايجابياتها تشبه كما لو اعتبرنا الدستور فرد وسالت شخص ما رأيك بفلان فقال لك (انه جيد)وسألت عن الاسباب فقال لك:لقد طور وعدل من نفسه فأصبح لا يسرق ولا يخون الامانه ولا يقوم بعمليات التزوير والرشوه
كل هذا جيد _انا معك فى ذلك _ولكن لا تنسى انه مازال يطلق البصرمثلا ,مازال يكذب , مازال يعيبه اكثر من مائة شائبه اخرى لم يلمسها بتعديله0
كما ان ذلك الدستور المرقع الساقط تم تعديله اكثر من مره من سنة 71الى اليوم وكل ما يعدل لا ينتج اثرا طيبا بل يعود للأسوأ ," وانا اقول ساقط بناءا على ماحدث فلما قلت ان اسناد مهام الرئاسه (للمجلس الاعلى للقوات المسلحه)عمل غير دستورى فما درسناه انه فى حالة خلو منصب الرئيس يقوم بالمهام رئيس مجلس الشعب لحين انتخاب رئيس جديد وان كان المجلس منحلا يقوم بها رئيس المحكمه الدستوريه العليا,ردوا قائلين بأن هذا كان فى الدستور القديم وسقط الدستور بسقوط النظام "
كما اننى لا ارى فى هذه الأيجابيات اذا قلنا نعم ما سنحرم منه لو قلنا لا فلو قلنا نعم سنتمتع بأيجابيات التعديلات ولنعطها درجة مثلا 60 بالمائه فما بالك لو قلنا لا وتم انشاء دستور جديد يحتوى على مواد اخرى تحقق لنا التمتع بالاربعين بالمائه الباقيه
-*اى لماذا نرضى بالاقل وفى ايدينا التمتع بالأكثر*-
:
وساقوم بفرد التعقيبات واحده تلو الاخرى من وجهة نظرى على اسباب القائلين بنعم
1- بخصوص الماده الثانيه فهى لم تمس حقيقة ولن تمس حتى فى الدستور الجديد لاننا نعتبرها من المواد الغير قابله للتعديل او التغيير من المائه مثلا المذكورين سابقا0
2- وعن الغاء الماده (179) فهذا حل وسط قصد منه تهدئة الوضع العام من النظام السابق وأصبح الآ ن امر طبيعى ان تلغى حتى فى الجديد كما اننا لو ا قلنا لا سيتم الغاء مواد اخرى تكفل لنا الحريات اكثر, لم يتعرض لها التعديل
3- اما عن موضوع مدة الرئاسه فان كان يروق لهم ذلك فلنجعله فى الدستور الجديد, بالأضافه لنصوص جديده تلغى النصوص القديمه المتضمنه لشروط انتجت فساد الحاكم مما تلاه فساد النظام بالكامل0
4- واخيرا عن مسالة الاشراف القضائى مع خالص تقديرى لقضائنا المصرى وانا رجل (قانون) واعلم مدى نزاهة قضائنا المصرى ,فلقد اجريت قبل سابق انتخابات عليها اشراف قضائى قبل ان يلغى ذلك الاشراف واسفرت ايضا عن مجلس شعب ملوث
اعلم ان وجود قضاء لا يسمح بالتزوير فى اللجان ولكن وجود شروط فاسده لم يتم لمسها بالتغيير او التعديل يفرز مرشح غير مستوفى كل الشروط الجديده والتى ستضع فى الدستورالمزعوم انه ستقوم لجنه تأسيسيه بوضعه فيما بعد وجود رئيس0
وأخيرا :
لم ارض بكل هذا وانا فى يدى واستطيع ان اقوم بوضع دستور جديد غير مرقع وغير ساقط ,,,اعلم ان الكثير سيقول المده التى ياخذها وضع دستور جديد , فلقد قال دستوريين فى مصر وهم القائمين على تلك التعديلات امران:
1- ان وضع دستور جديد اسهل من تعديل القديم
2- انه لدينا دساتير جاهزه يمكن ان نهتدى بها فى وضع الجديد
3- المفاجاه لمن يتخيل ان وضع دستور جديد كارثه ان اساتذة وطلاب كلية الحقوق وضعوا دستورافى تلك الفتره فما بالك بأناس دستوريين ماذا يفعلوا
ملحوظه : وعن موضوع اننا نرضى بالتعديل لانقاذ اقتصادنا انهم نسوا اننا ان رضينا بالتعديلات فستجرى انتخابات مجلسى شعب وشورى ورئاسيه ثم تصويت واستفتاء لدستور جديد كما يقولون وفى حالة وضع دستور جديد بعد الرئاسه ستتغير شروط كثيره فى الاعضاء المنتخبين وليس بيعدا ان نحل المجلس مره اخرى لعد مطابقة الاعضاء للشروط الجديده ونقوم بعزل الرئيس لانه ادى يمينا دستوريا امام مجلس غير شرعى وغير دستورى وبالتالى نخوض معركة تصويت على دستور جديد وانتخابات مجلس شعب جديده وانتخابات رئاسيه جديده ( ونحن ندرك خطورة ذلك اقتصاديا ) والقائلون بنعم تناسوا ذلك الكلام
هذا رأى ولكل منا وجهة نظره والمهم ان القائل بلا او بنعم يشهد الله ان غايته الاساسيه هى صالح الوطن والمواطنين
لاننا اولا واخيرا لن نختار الحاكم لان الحكم لله يهبه من يشاء وينزعه ممن يشاء فالحاكم القادم سياتى بأمر من الله نتيجة لصلاح النفوس وان نعمل جاهدين على حب هذا البلد اكثر واكثر ونقدم له كل ما لدينا
ارجو الا اكون اطلت عليكم شكرا لكل من قرأ
من اخوكم احمد الشيخ
: